علموني اهلي ..قصيدة شعبية للشاعر كاظم الزهيري

#علّموني #اهلي..

أحب الناس وزرع بالدرب خير وگناطر

اوعلموني... الماتحبه الناس عمره يعيش خاسر

اوگال أبوي.. ابصوت واضح:

لاتعاشر ربع تربطهم مصالح

لان عشرتهم فقاعة اوتنتهي من عين باچر!!

علموني الشرف قبله اوچف دعاء ..

اوعفت ابنيه گظتها أبيت طاهر

و أمي گالت... يمه جاراتك خواتك

خلي عينك باردة اوبالزينه حاضر

وگالوا : ألدنيه قطار ...

وابمحطاته يدور.. ونته بي راكب مسافر…

ايه ياجرح المكابر...

اشگد خطيه الناس چانت فقره كلش

على ألفطره أتعيش..

بس عدهم كرامه وبگلبهم كلشي عامر

وهسه لا مومثل الأول

كلشي بالوادم تبدل

ناس لبست وجه ثاني... اوناس بالباطل تجاهر

اوعلموني الغيره گطره

اوحاجه بس اشگد عزيزه بعوز شاعر

اوعلموني امشي ابسچچ بس بيها فقره

لان ماعدهم مصالح بالحياة..

الضحكة عدهم تنعجن وسط الچنابر

اوياچنابرهم إمام وبيها شاره

لان سترت كل يتامى الكون..

والمسكين عايش بيها صابر

يامراجعنه السياسية .. او يصنّاع القرار

ليش مشكلة الفقير اعيونها اتعاين الباچر؟

ونتوا عيشتكم دفوا ..اوجنه اونعيم..

اوصيفكم چله اوجحيل...

اوليلكم غفوة اوخدر..

اوببيوتكم حراسكم داير مداير

سدوا كل بيبانكم .. نگدر نعيش..

بس كفر بوجوهنا أتسدون بيبان الضماير

 كاظم الزهيري 9/10/2012